Lýsing

Fjallaskíðahópur Fjallaskíðunar er tilvalinn fyrir byrjendur á fjallaskíðum og þá sem vilja rifja upp grundvallaratriðin í fjallaskíðamennsku. Við bjóðum upp á frábæran félagsskap með úrvalsfararstjórn og fullt af spennandi ferðum. Prógrammið hefst í janúar og lýkur í maí. Dagskráin er afar fjölbreytt og samanstendur af bóklegri fræðslu, skíðakennslu, skíðapreppi, kvöldferðum, fjölbreyttum helgarferðum og endar svo á hæsta tindi Íslands, Hvannadalshnjúk. Á þessu námskeiði lærir þú margt um góða skíðatækni, rétta notkun á skíða- og öryggisbúnaði, leiðarval og aðstæður sem þarf að varast eins og snjóflóð, sem og grunnatriði í snjóflóðamati. Markmið okkar er að eftir námskeiðið getir þú verið sjálfbjarga í fjöllunum þegar þú ferð á fjallaskíði.

Fjöldi þátttakenda

Minnst 10, mest 40.

Verð

Skráningargjald er 149.900kr en hækkar í 169.900kr. 1. janúar 2023.

Staðfestingargjald: 40.000 kr. (fæst ekki endurgreitt).

Til að tryggja sér sæti í hópnum þarf að greiða óafturkræft staðfestingargjald að upphæð 40.000 kr. Eftirstöðvar koma til greiðslu í byrjun janúar 2023. Hægt er að semja um greiðsludreifingu með því að senda póst á info@fjallaskidun.is. Maka afsláttur er 10% af síðara gjaldi.

Lágmarkskröfur

Þátttakendur verða að kunna á venjuleg svigskíði eða snjóbretti og vera sjálfbjarga í flestöllum troðnum brekkum skíðasvæða og breytilegum snjóaaðstæðum til að geta tekið þátt í fjallaskíðaprógraminu. Það er mun meira krefjandi að stunda fjallaskíði í alls konar aðstæðum utan brauta en að skíða á svigskíðum í troðinni brekku á skíðasvæði. Mikilvægt er að þátttakendur séu í góðu líkamlegu formi og hafi úthald í að vera á skíðum allan daginn (6-8 klst.). Að jafnaði er miðað við að ganga upp og skíða niður 600-1.500 m á dag.

Dagskrá 2023

12. janúar	Fjallaskíðakvöld í versluninni Everest kl. 17:30
18. janúar	Fyrirlestur
25. janúar	Skíðakennsla í Bláfjöllum
28. janúar	Verklegur útidagur og snjóflóðaæfingar
8. febrúar	Preppkvöld
18. febrúar	Dagsferð á Hengill
1. mars	Kvöldferð í nágrenni Reykjavíkur
18. mars	Helgrindur á Snæfellsnesi
1. apríl	Snæfellsjökull eða Eyjafjallajökull
19. apríl	Kvöldferð í nágrenni Reykjavíkur
7. maí	Hvannadalshnjúkur